Помош и поддршка

Ако имате проблеми на интернет, не паничете! Има места каде можете да побарате помош и работи што можете да ги направите сами.

Мислам дека сум измамен

Ако сметате дека сте жртва на измама, не срамете се и не кријте го тоа. Постојат чекори што можете да ги преземете за да го поправите проблемот.

Контактирајте со вашата банка (Contact your bank) и запрете какви било понатамошни плаќања на измамникот.
Пријавете го измамникот (Report the scam) кај Австралиската комисија за конкуренција и потрошувачи (Australian Competition and Consumer Commission). Одете на интернет-страницата www.scamwatch.gov.au за помош со пријавувањето и за да ги разберете измамите.
Подигнете ја свеста (Raise awareness). Ако знаете некого друг кој бил измамен, кажете му за вашиот случај.

Мислам дека мојот компјутер има вирус

Ако вашиот компјутер почне да се однесува чудно, можеби е заразен со вирус. Некои вообичаени знаци на вирус се:

пораки што велат дека вашите датотеки се заклучени и дека треба да платите за да ги отклучите
програми што не се стартуваат
интернет-страници што се отвораат кога не сакате
реклами што се јавуваат како скок-прозорци и го покриваат вашиот компјутерски екран
вашиот компјутер работи многу бавно.

Ако мислите дека имате вирус, направете го следното:

Отворете го противвирусниот софтвер (antivirus software) и извршете рачно скенирање. Тоа би можело да открие некој проблем.
Ако сте претплатени на некоја платена противвирусна програма, јавете се на нивната линија за помош. Дел од цената на претплатата би требало да вклучува пристап до дежурна линија за помош (help hotline).
Повикајте ја комјутерската поддршка. Ако ништо од тоа не помага, време е да се побара помош. Најнапред побарајте помош од некој роднина кој познава компјутери или најдете некој локален сервис за компјутери.

Мислам дека некој има пристап до моите лозинки

Ако сметате дека некој друг имал пристап до некоја од вашите интернет-сметки, најважно нешто што треба да направите е да ја смените лозинката што е можно поскоро. Одете на интернет-страницата, потоа најдете го делот за Помош (Help) и делот каде можете да ја смените вашата лозинка.

Кога да побарате помош

Можеби најважно од сѐ е да знаете кога да побарате помош. Не срамете се што имате проблем. Сите луѓе постојано имаат проблеми и најдете некого кој ќе ви помогне. Можеби тоа се луѓето во ACCC што се занимаваат со вируси, или некој технички обучен пријател или семеен член, па дури и вашиот локален комјутерски техничар. Секогаш постои некој кој може да помогне.